भुसावळ (प्रतिनिधी) – भुसावळ येथील माऊली प्लाझा परिसरातील ओपन स्पेसवर झालेल्या अनधिकृत बांधकामप्रकरणी विभागीय आयुक्त कार्यालय, नाशिक यांनी कठोर भूमिका घेत कारवाईचे आदेश दिले आहेत. संबंधित बिल्डर तसेच श्री समर्थ महिला बहुदेशीय संस्थेवर कायदेशीर कारवाई करण्याच्या सूचना देण्यात आल्या असून, जळगाव येथील जिल्हा सह आयुक्त (न.पा.प्र.) आणि भुसावळ नगरपरिषदेचे मुख्याधिकारी यांना तातडीने कार्यवाही करण्याचे निर्देश देण्यात आले आहेत.
प्रकरणाचा तपशील
भुसावळ येथील सर्व्हे क्र. ११५/१/अ मधील ओपन स्पेसवर अनधिकृतरीत्या बांधकाम करण्यात आल्याची तक्रार स्थानिक रहिवासी प्रमोद जगन्नाथ पाटील यांनी प्रशासनाकडे केली होती. त्यांच्या तक्रारीनुसार, माऊली प्लाझा अपार्टमेंटमध्ये अनेक गंभीर अनियमितता आढळून आल्या आहेत.
यामध्ये मोकळ्या जागेवर टिनशेड व सिमेंट गोदामाचे अतिक्रमण, मंजूर नकाशाविरुद्ध बांधकाम, पार्किंगमधून बाहेर पडण्यासाठी आवश्यक रस्त्याचा अभाव, तसेच कोणतीही परवानगी न घेता उभारण्यात आलेला मोबाईल टॉवर यांचा समावेश आहे.
प्रशासनाची हालचाल
प्रमोद पाटील यांनी १९ जानेवारी ते २६ मार्च २०२६ या कालावधीत सातत्याने पाठपुरावा करत तक्रारी सादर केल्या होत्या. या तक्रारींची दखल घेत सह आयुक्त नितीन पवार यांच्या स्वाक्षरीने आदेश जारी करण्यात आले आहेत. या आदेशानुसार, संबंधित अतिक्रमण ३० दिवसांच्या आत हटवून दोषींवर दंडात्मक कारवाई करण्यासोबतच सखोल चौकशी करण्याचे निर्देश देण्यात आले आहेत.
तक्रारदाराची भूमिका
प्रमोद पाटील यांनी या प्रकरणात देवस्थानच्या आडोशाने संस्थेकडून होणाऱ्या गैरव्यवहारावर तसेच बिल्डरकडून झालेल्या व्यावसायिक अतिक्रमणावर प्रश्न उपस्थित केले आहेत. तसेच ५ फेब्रुवारी २०२६ रोजी करण्यात आलेल्या अपूर्ण पंचनाम्याची नव्याने चौकशी करण्याची मागणी त्यांनी केली आहे.
पुढील पाऊल
विभागीय आयुक्तांच्या आदेशानंतर आता भुसावळ नगरपरिषद प्रशासन या प्रकरणात किती तत्परतेने आणि प्रभावीपणे कारवाई करते, याकडे सर्वांचे लक्ष लागले आहे.
