जळगाव (प्रतिनिधी) : जळगाव जिल्हा मध्यवर्ती सहकारी बँकेच्या निवडणुकीमुळे जिल्ह्यातील राजकीय वातावरण चांगलेच तापू लागले आहे. बँकेच्या २१ जागांसाठी निवडणूक प्रक्रिया सुरू असून, या निवडणुकीत जिल्ह्यातील मंत्री, आमदार आणि माजी मंत्र्यांची प्रतिष्ठा पणाला लागली आहे. उमेदवारी अर्जांच्या छाननीनंतर काही महत्त्वाच्या उमेदवारांना दिलासा मिळाला असून, काहींना मात्र निवडणुकीच्या रिंगणातून बाहेर पडावे लागण्याची परिस्थिती निर्माण झाली आहे. या निवडणुकीतील महत्त्वाच्या घडामोडींमध्ये शिवसेना शिंदे गटाचे आमदार किशोर पाटील यांचे सुपुत्र सुमित पाटील यांचा उमेदवारी अर्ज चर्चेत आला आहे. निवडणूक निर्णय अधिकाऱ्यांनी त्यांचा अर्ज अवैध ठरविला होता. या निर्णयाविरोधात सुमित पाटील यांनी नाशिक विभागीय आयुक्तांकडे दाद मागितली. विभागीय आयुक्तांनी त्यांचा अर्ज वैध ठरविल्याने त्यांना मोठा दिलासा मिळाला असून, निवडणूक लढविण्याचा मार्ग मोकळा झाला आहे. दुसरीकडे, जामनेर विकास सोसायटी मतदारसंघातून मंत्री गिरीश महाजन यांच्या विरोधात उमेदवारी अर्ज दाखल करणारे रघुनाथ पाटील यांचाही अर्ज निवडणूक निर्णय अधिकाऱ्यांनी अवैध ठरविला होता. या निर्णयाला त्यांनी नाशिक विभागीय आयुक्तांकडे आव्हान दिले. मात्र, विभागीय आयुक्तांनी त्यांची हरकत फेटाळून लावल्याने गिरीश महाजन यांना दिलासा मिळाला आहे. त्यामुळे या मतदारसंघातील निवडणुकीच्या समीकरणांमध्ये महत्त्वाचा बदल झाला आहे. या निवडणुकीकडे केवळ सहकारी बँकेची निवडणूक म्हणून न पाहता जिल्ह्यातील राजकीय वर्चस्वाच्या दृष्टीनेही पाहिले जात आहे. मंत्री गिरीश महाजन यांच्यासह केंद्रीय राज्यमंत्री रक्षा खडसे, पालकमंत्री गुलाबराव पाटील आणि माजी मंत्री गुलाबराव देवकर यांच्यासाठीही ही निवडणूक प्रतिष्ठेची मानली जात आहे. जिल्ह्यातील विविध राजकीय गटांकडून आपापले वर्चस्व सिद्ध करण्यासाठी प्रयत्न सुरू आहेत. दरम्यान, उमेदवारी अर्ज मागे घेण्याची अंतिम मुदत १७ नोव्हेंबर असल्याने या तारखेनंतरच निवडणुकीचे खरे चित्र स्पष्ट होणार आहे. किती जागांवर प्रत्यक्ष मतदान होणार, किती उमेदवार माघार घेणार आणि किती जागांवर बिनविरोध निवड होणार, याकडे राजकीय वर्तुळाचे लक्ष लागले आहे. जळगाव जिल्हा बँकेच्या या निवडणुकीत कोणते राजकीय समीकरण आकाराला येते, प्रमुख नेत्यांच्या गटांकडून कोणती रणनीती आखली जाते आणि अंतिमतः किती जागांसाठी मतदान होते, हे पाहणे महत्त्वाचे ठरणार आहे. जिल्हा बँकेच्या निवडणुकीतील या सर्व राजकीय घडामोडींचा सविस्तर आढावा आमचे प्रतिनिधी सुमित देशमुख यांनी घेतला आहे.
