भुसावळ (प्रतिनिधी) : प्रशासकीय सेवेत तब्बल २६ ते २७ वेळा बदल्यांचा सामना करूनही भ्रष्टाचाराविरोधातील भूमिका कायम ठेवणारे, पारदर्शक व निस्वार्थी प्रशासनाचे प्रतीक मानले जाणारे अन्न व औषध प्रशासन (FDA) आयुक्त तुकाराम मुंढे यांना राज्याचा सर्वोच्च नागरी सन्मान 'महाराष्ट्र भूषण' पुरस्कार देऊन गौरविण्यात यावे, अशी घणाघाती मागणी भुसावळ येथील सामाजिक कार्यकर्ते शिशिर डी. जावळे यांनी राज्य सरकारकडे केली आहे. प्रशासकीय क्षेत्रातील आदर्श व्यक्तिमत्त्व तुकाराम मुंढे यांनी आपल्या प्रदीर्घ प्रशासकीय कारकिर्दीत ज्या-ज्या ठिकाणी जबाबदारी सांभाळली, त्या प्रत्येक ठिकाणी कायद्याचे राज्य प्रस्थापित करण्यासाठी प्रयत्न केले. कोणत्याही राजकीय दबावाला बळी न पडता सामान्य नागरिकांच्या हक्कांसाठी आणि भ्रष्टाचाराला आळा घालण्यासाठी त्यांनी घेतलेले निर्णय अनेकांसाठी प्रेरणादायी ठरले आहेत. वारंवार झालेल्या बदल्या या त्यांच्या प्रामाणिक व तडजोड न करणाऱ्या भूमिकेचेच प्रतीक असल्याचे मत शिशिर जावळे यांनी व्यक्त केले. 'महाराष्ट्र भूषण'साठी योग्य उमेदवार 'महाराष्ट्र भूषण' हा पुरस्कार आपल्या क्षेत्रात उल्लेखनीय आणि अद्वितीय योगदान देणाऱ्या व्यक्तींना प्रदान केला जातो. तुकाराम मुंढे यांचे प्रशासकीय कार्य हे निस्वार्थ सेवाभाव, प्रामाणिकपणा आणि लोकहिताच्या तत्त्वांचे उत्कृष्ट उदाहरण असल्याचे जावळे यांनी म्हटले आहे. अशा निष्कलंक आणि कर्तृत्ववान अधिकाऱ्याचा सन्मान केल्यास राज्याच्या प्रशासकीय व्यवस्थेत सकारात्मक संदेश जाईल आणि भ्रष्टाचाराविरोधातील लढ्याला अधिक बळ मिळेल, असेही त्यांनी नमूद केले. जनभावनांना मिळतोय प्रतिसाद भुसावळचे सामाजिक कार्यकर्ते शिशिर डी. जावळे यांनी ही मागणी थेट राज्य शासन आणि मंत्रालय स्तरावर पाठपुरावा करून पूर्णत्वास नेण्याचा निर्धार व्यक्त केला आहे. तुकाराम मुंढे यांच्यासारख्या प्रामाणिक आणि धाडसी प्रशासकीय अधिकाऱ्याचा गौरव व्हावा, अशी अपेक्षा समाजातील विविध स्तरांतून व्यक्त होत असून, ही मागणी सध्या राज्यभरात चर्चेचा विषय ठरत आहे.
