जळगाव (प्रतिनिधी) –
शहरातील मतदारांमध्ये मतदानाबाबत जनजागृती वाढवण्यासाठी आणि तरुणांचा सक्रिय सहभाग वाढवण्यासाठी महापालिका प्रशासनाच्या वतीने रील मेकिंग स्पर्धेचे आयोजन करण्यात आले आहे. “विकासासाठी मतदान नक्की करा” हा संदेश घराघरात पोहोचवण्याच्या उद्देशाने सोशल मीडियाच्या माध्यमातून ही स्पर्धा राबवली जात आहे.
या उपक्रमांतर्गत मतदानाचे महत्त्व प्रभावीपणे मांडणाऱ्या उत्कृष्ट रिल्स तयार करणाऱ्या स्पर्धकांना रोख पारितोषिके देऊन गौरविण्यात येणार आहे. प्रथम पारितोषिक ३ हजार रुपये, तर द्वितीय पारितोषिक २ हजार रुपये रोख स्वरूपात देण्यात येणार आहे. स्पर्धेसाठी निश्चित नियमावली जाहीर करण्यात आली असून, नियमांचे उल्लंघन झाल्यास संबंधित रील अपात्र ठरवली जाईल, असे मनपा प्रशासनाने स्पष्ट केले आहे.
स्पर्धेत सहभागी होण्यासाठी स्पर्धकाचे वय किमान १८ वर्षे पूर्ण असणे आवश्यक असून तो संबंधित शहराचा रहिवासी असणे बंधनकारक आहे. रील पोस्ट करताना महापालिकेच्या अधिकृत सोशल मीडिया अकाउंट @jome_digital (जसे घोषित आहे) ला टॅग करणे अनिवार्य राहणार आहे. मतदानाचे महत्त्व, लोकशाहीतील नागरिकांची भूमिका आणि मतदान करण्याचे आवाहन या मुद्द्यांचा प्रभावी समावेश रीलमध्ये अपेक्षित आहे.
मतदानाबाबत सकारात्मक वातावरण निर्माण व्हावे आणि विशेषतः पहिल्यांदाच मतदान करणाऱ्या तरुणांमध्ये उत्साह वाढावा, या उद्देशाने हा उपक्रम राबवण्यात येत असून नागरिकांनी मोठ्या संख्येने सहभागी व्हावे, असे आवाहन महापालिका प्रशासनाकडून करण्यात आले आहे.
