“
भुसावळ – भुसावळ स्पोर्ट्स अँड रनर्स असोसिएशन आयोजित ‘बीसारा लेडीज इक्वलिटी रन’ या खास महिलांसाठीच्या रनची अधिकृत घोषणा करण्यात आली असून भुसावळ शहरातील कोरोनेशन क्लब येथे 3 मार्च रोजी हा रन आयोजित केला जाणार आहे. सदरचा रन हा केवळ महिलांसाठी असून पुरुष सदस्य अथवा कुठलीही तृतीयपंथी व्यक्ती या रनमध्ये सहभागी होऊ शकणार नाही. सदरच्या रनसाठी नावनोंदणी रविवार दिनांक ७ जानेवारीपासून सुरू होत असून नावनोंदणी ऑफलाइन व ऑनलाईन अशा दोन्ही पद्धतीने महिला सदस्य करू शकतात. ऑफलाइन नावनोंदणीसाठी डॉ चारुलता पाटील (सुप्रभा हॉस्पिटल, पंचमुखी हनुमान मंदिराजवळ,भुसावळ.मोबाईल क्रमांक ९८२३७९९७५८) व डॉ नीलिमा नेहेते (नेहेते हॉस्पिटल,अष्टभुजा मंदिराजवळ,भुसावळ. मोबाईल क्रमांक ९३२५६३८७१७) यांच्याशी संपर्क करता येईल. त्याचबरोबर ऑनलाईन नावनोंदणी townscript या संकेतस्थळावर उपलब्ध असून त्यासाठी प्रवीण पाटील (मोबाईल क्रमांक ९४२२७७२१७८) यांच्याशी संपर्क करता येईल.
यावर्षी ही स्पर्धा ३ किमी, ५ किमी व १० किमी या तीन श्रेणींमध्ये घेतली जाणार असून नावनोंदणी शुल्क ३ किमीसाठी ३५० रुपये, ५ किमीसाठी ५०० रुपये व १० किमी साठी ७०० रुपये निर्धारित करण्यात आले आहे. ५ किमी व १० किमीचा रन हा आर एफ आय डी प्रणालीद्वारे टाईम रन असेल. म्हणजेच या श्रेणीमध्ये धावणे पूर्ण झाल्यानंतर सहभागी महिलेला लागलीच आपल्या भ्रमणध्वनी क्रमांकावर किती मिनिटात स्पर्धा पूर्ण केली याचा संदेश प्राप्त होईल व त्याशिवाय ऑनलाइन पद्धतीने प्रमाणित वेळेचे प्रमाणपत्र देखील मिळते. या रनचे हे सलग चौथे वर्ष असून याआधीच्या तीनही सत्रांमध्ये भुसावळ शहरातील महिला वर्गाने मोठ्या प्रमाणात सहभाग घेतलेला होता व त्यातील काही महिला नियमित धावायला लागून त्यांच्या आरोग्याच्या संबंधित इतर समस्याचे निराकरण झालेले असून आज त्या सुदृढ आयुष्य जगात आहेत. त्यामुळे यावर्षीच्या रनमध्ये देखील अधिकाधिक महिलांनी सहभागी व्हावे असे आवाहन भुसावळ स्पोर्ट्स अँड रनर्स असोसिएशनच्या आयोजकांतर्फे करण्यात आले आहे.
