भुसावळ (प्रतिनिधी) : हरतालिका पर्वानिमित्त येथील श्री विठ्ठल रुखमाई मंदिरात परिसरातील महिलांच्या वतीने सामूहिक हरतालिका पूजनाचे आयोजन करण्यात आले. सोमवार रोजी झालेल्या या धार्मिक कार्यक्रमात सौभाग्यवती महिला तसेच कुमारिकांनी मोठ्या संख्येने उपस्थित राहून श्रद्धा व भक्तिभावाने हरतालिका पूजन केले. हरतालिका व्रताला हिंदू धर्मपरंपरेत विशेष महत्त्व असून, विवाहित महिला पतीच्या दीर्घायुष्यासाठी आणि सुखी वैवाहिक जीवनासाठी, तर कुमारिका मनासारखा जीवनसाथी मिळावा यासाठी हे व्रत श्रद्धेने करतात. या पार्श्वभूमीवर श्री विठ्ठल रुखमाई मंदिरात महिलांनी उपवास करून सामूहिक पूजनात सहभाग घेतला. यावेळी पुरोहित जोशी यांनी शास्त्रोक्त पद्धतीने मंत्रोच्चार व धार्मिक विधी पार पाडत उपस्थित महिलांकडून हरतालिकेचे विधीवत पूजन करून घेतले. पूजनादरम्यान महिलांनी पारंपरिक पद्धतीने हरतालिकेची पूजा, आरती व प्रार्थना केली. मंदिर परिसरात यावेळी भक्तिमय वातावरण निर्माण झाले होते. शहरातील विविध भागांतून महिला मोठ्या संख्येने या सामूहिक पूजनासाठी उपस्थित राहिल्या. पारंपरिक वेशभूषेत सहभागी झालेल्या महिलांनी श्रद्धा, भक्ती आणि उत्साहाने हरतालिका व्रताची परंपरा जपत सामूहिक पूजन केले. कुमारिकांचाही या धार्मिक सोहळ्यात लक्षणीय सहभाग होता. सामूहिक पद्धतीने पूजनाचे आयोजन केल्याने महिलांना एकत्रितपणे धार्मिक विधी पार पाडण्याची संधी मिळाली. यामुळे मंदिर परिसरात दिवसभर भक्तिमय वातावरण पाहायला मिळाले. फोटो कॅप्शन : भुसावळ येथील श्री विठ्ठल रुखमाई मंदिरात महिलांनी सामूहिक हरतालिकेचे पूजन केले.
