भुसावळ (प्रतिनिधी) : भुसावळ शहरातील महिला व विद्यार्थिनींच्या सुरक्षिततेसह तरुणाईला अमली पदार्थांच्या विळख्यातून दूर ठेवण्यासाठी जळगाव पोलीस दलाने महत्त्वपूर्ण पाऊल उचलले आहे. जळगाव जिल्ह्याचे पोलीस अधीक्षक श्रीकांत धिवरे यांच्या हस्ते शुक्रवार, दि. १४ ऑगस्ट २०२६ रोजी भुसावळ उपविभागातील ‘दामिनी पथका’च्या नव्या वाहनाचे उद्घाटन करण्यात आले. यानंतर भुसावळ शहरात दामिनी पथक पूर्णपणे कार्यरत झाले आहे. शाळा-महाविद्यालयांमध्ये जाणाऱ्या विद्यार्थिनी तसेच शहरातील महिलांच्या सुरक्षेच्या दृष्टीने या विशेष पथकाची नियुक्ती करण्यात आली आहे. महिला व मुलींच्या सुरक्षिततेसाठी आवश्यक उपाययोजना करणे, शाळा-महाविद्यालये आणि वर्दळीच्या परिसरातील टवाळखोरांचा बंदोबस्त करणे, तसेच अडचणीच्या वेळी महिला व मुलींना तातडीने मदत आणि योग्य मार्गदर्शन उपलब्ध करून देणे, हा दामिनी पथकाचा प्रमुख उद्देश आहे. नाहाटा महाविद्यालयात ‘RISE मिशन’अंतर्गत जनजागृती महिला सुरक्षेसोबतच युवकांना व्यसनापासून दूर ठेवण्यासाठी भुसावळ येथील नाहाटा महाविद्यालयात पोलिसांच्या ‘RISE मिशन’अंतर्गत विशेष जनजागृती कार्यक्रमाचे आयोजन करण्यात आले. यावेळी पोलीस अधिकाऱ्यांनी विद्यार्थ्यांना ‘RISE मिशन’बाबत सविस्तर मार्गदर्शन केले. अमली पदार्थांच्या सेवनामुळे आरोग्य, शिक्षण, कुटुंब आणि भविष्यास होणाऱ्या गंभीर परिणामांबाबत विद्यार्थ्यांमध्ये जनजागृती करण्यात आली. या अभियानाच्या निमित्ताने महाविद्यालयात ‘अमली पदार्थ विरोधी’ (Anti-Drug) विषयावर चित्रकला स्पर्धेचेही आयोजन करण्यात आले. स्पर्धेत विद्यार्थ्यांनी उत्स्फूर्त सहभाग घेतला. उत्कृष्ट कामगिरी करणाऱ्या एकूण १५ विद्यार्थी-विद्यार्थिनींची निवड करून त्यांना उपस्थित मान्यवरांच्या हस्ते बक्षिसे व प्रमाणपत्रे देऊन गौरविण्यात आले. या कार्यक्रमास जळगावचे पोलीस अधीक्षक श्रीकांत धिवरे, अपर पोलीस अधीक्षक संदीप गावित, भुसावळचे उपविभागीय पोलीस अधिकारी केदार बारबोले यांची प्रमुख उपस्थिती होती. तसेच नाहाटा महाविद्यालयातील प्राध्यापकवर्ग आणि विद्यार्थी-विद्यार्थिनी मोठ्या संख्येने उपस्थित होते. महिला, मुली आणि विद्यार्थ्यांच्या सुरक्षिततेला पोलीस प्रशासनाकडून सर्वोच्च प्राधान्य दिले जात असून, अमली पदार्थांच्या वाढत्या दुष्परिणामांविरोधात युवकांमध्ये जनजागृती करण्यासाठी अशा विधायक उपक्रमांचे सातत्याने आयोजन करण्यात येणार असल्याचे प्रशासनाकडून स्पष्ट करण्यात आले.
