दिल्लीच्या लाल किल्ला परिसरात मोठा स्फोट झाला. या स्फोटाचे कनेक्शन थेट जम्मू काश्मीरपर्यंत पोहोचल्याने खळबळ उडाली. या प्रकरणात काही डॉक्टरांची नावे पुढे आली असून त्यांनी जानेवारी महिन्यातच लाल किल्ल्याची रेकी केल्याचे स्पष्ट झाले. पुलवामातील दहशतवादी उमर हा i-20 गाडी चालवत असल्याचे स्पष्ट झाले. आता स्फोटाचे महाराष्ट्रापर्यंत धागेदोरे पोहोचले आहेत.
मागील काही दिवसांपासून या स्फोटाचा कट रचला जात असल्याचे स्पष्ट झाले. 11 तास गाडी दिल्लीमध्ये फिरत होती. दिल्लीच्या स्फोटाच्या पार्श्वभूमीवर महाराष्ट्र एटीएसकडून अत्यंत मोठी कारवाई करण्यात आली असून मुंब्रातील दोन जणांना एटीएसने ताब्यात घेतलंय. चार घरांवर छापेमारी करण्यात आली. त्यांची सध्या कसून चाैकशी केली जात असून काही माहिती पुढे येण्याचे संकेत आहेत.
मुंब्रा परिसरातील एका शिक्षकाच्या घरी छापा टाकून शोध मोहीम राबवण्यात आली. पुण्यात एटीएसने ताब्यात घेतलेल्या काही आरोपींच्या चौकशीदरम्यान एका आरोपीने मुंब्रा येथील रहिवासी असलेल्या शिक्षकाशी ओळखीचा दावा केला. एटीएस पथकाने मुंब्रा येथील कौसा विभागात असलेल्या शिक्षकाच्या निवासस्थानी छापा टाकला. यादरम्यान बराचवेळी शोध मोहिमही राबवण्यात आली. एटीएसकडून लॅपटॉप, मोबाईल फोन आणि इतर संगणक उपकरणे जप्त करण्यात आली.
शिक्षकाच्या घरी छापेमारी..
मिळालेल्या माहितीनुसार, मुंब्रा येथील त्याच्या निवासस्थानाची झडती घेतल्यानंतर, एटीएस पथकाने शिक्षकाला मुंबईतील कुर्ला परिसरातील त्याच्या दुसऱ्या निवासस्थानी नेले, जिथेही शोध घेतला. पुण्यातून एटीएसने ताब्यात घेतलेल्या आरोपींचा आणि या शिक्षकाचा थेट संबंध काही नाही ना? याचा शोध पोलिसांकडून घेतला जात आहे. ठाणे जिल्ह्यात महाराष्ट्र एटीएसने कारवाई केल्याने खळबळ उडाली आहे. महाराष्ट्र दहशतवाद विरोधी पथकाची मुंब्रा कौसा ज्या शिक्षकाच्या घरी छापेमारी केली त्याचं नाव इब्राहिम आबिदी आहे. इब्राहिम आबिदी हा मुंब्रा कौसा येथे भाड्याने रहात असल्याची माहिती. आबिदी हा दर रविवारी कुर्लाच्या एका मस्जिदमध्ये उर्दु शिकवण्यासाठी जात होता. कुर्लामध्ये त्याची दुसरी पत्नी राहत असून तिच्या घरीही एटीएसने छापेमारी केली. एटीएसला संशय आहे की, हा मुलांना दहशतवादी कृत्यांसाठी प्रवृत्त करत होता.
साहित्यांचे ॲनालिसिस होणार..
एटीएसने या घरातून इलेक्ट्रॉनिक वस्तू जप्त केल्या असून या साहित्यांचे ॲनालिसिस केले जाणार आहे. पुण्यातील अल-कायदा या दहशतवादी संघटनेचे साहित्य बाळगल्याच्या आरोपावरून एका सॉफ्टवेअर इंजिनिअरला पुण्यातून अटक केली होती. याच प्रकरणी आता महाराष्ट्र एटीएसने मुंब्रा भागात छापेमारी केली आहे. अल कायदा इन इंडियन सबकाँटिनेन्ट’ (एक्यूआयएस) या दहशतवादी संघटनेच्या समर्थनार्थ जिहादचा प्रसार-प्रचार करून देशाच्या एकता व सुरक्षिततेला धोका निर्माण केल्याच्या आरोपावरून जुबेर इलियास हंगरगेकर याला पुणे एटीएसने अटक केली होती.
