भुसावळ (प्रतिनिधी)- मध्य रेल्वेच्या भुसावळ विभागातील कॅटरिंग सेवांच्या सद्यस्थितीचा आढावा घेण्यासाठी तसेच प्रवाशांच्या सुविधांमध्ये अधिक सुधारणा करण्याच्या उद्देशाने दिनांक 30.09.2026 रोजी विभागीय रेल्वे व्यवस्थापक कार्यालय, भुसावळ येथे विभागातील कॅटरिंग परवानाधारकांसोबत बैठक आयोजित करण्यात आली. या बैठकीस भुसावळ विभागातील विविध स्थानकांवरील सुमारे 60 कॅटरिंग परवानाधारकांनी सहभाग घेतला. यावेळी कॅटरिंग परवानाधारकांना प्रवाशांना दर्जेदार, स्वच्छ व निर्धारित दरांमध्ये खाद्यपदार्थ उपलब्ध करून देणे ही सर्वोच्च प्राथमिकता असावी, असे निर्देश देण्यात आले. कॅटरिंग युनिटमध्ये स्वच्छता, खाद्यपदार्थांची गुणवत्ता, अग्निसुरक्षा व विद्युत सुरक्षा तसेच रेल्वे आणि FSSAI यांनी निर्धारित केलेल्या मानकांचे काटेकोरपणे पालन करण्याच्या सूचना देण्यात आल्या. प्रवाशांशी नम्र व सौजन्यपूर्ण वर्तन करण्यावर तसेच कोणत्याही प्रकारच्या तक्रारीची परिस्थिती निर्माण होणार नाही, याची विशेष काळजी घेण्याचे निर्देश देण्यात आले. बैठकीदरम्यान अधिक दर आकारणीवर कडक कारवाई, प्रवासी सुविधा व सौजन्यपूर्ण वर्तन, स्वच्छता व खाद्य स्वच्छता, फ्लाय कॅचर, अग्नि व विद्युत सुरक्षा, दंडाची रक्कम वेळेत जमा करणे, डिकॉय चेक, खाद्यपदार्थांचे नमुना परीक्षण, भोजन वाढण्याचे निर्धारित मानक, FSSAI अनुपालन, कचरा व्यवस्थापन तसेच थोक कचरा उत्पादक म्हणून निर्धारित नियम व तरतुदींचे पालन यासंदर्भात महत्त्वपूर्ण सूचना देण्यात आल्या. विभागीय रेल्वे व्यवस्थापकांनी सर्व परवानाधारकांना प्रवासी समाधान, सेवेची गुणवत्ता आणि स्वच्छता यांना सर्वोच्च प्राधान्य देऊन रेल्वे प्रशासनाने निर्धारित केलेल्या सर्व नियम व मानकांचे पूर्णतः पालन सुनिश्चित करण्याचे आवाहन केले. तसेच नियमांचे उल्लंघन किंवा प्रवाशांशी संबंधित तक्रारी आढळल्यास त्या गांभीर्याने घेतल्या जातील आणि नियमानुसार आवश्यक कारवाई करण्यात येईल, असे स्पष्ट करण्यात आले. या बैठकीचा उद्देश भुसावळ विभागातील कॅटरिंग सेवा सुरक्षित, स्वच्छ, दर्जेदार आणि प्रवाशाभिमुख बनविणे तसेच परवानाधारकांना निर्धारित मानके व नियमांचे प्रभावी पालन करण्यासाठी मार्गदर्शन करणे हा होता. बैठकीत उपस्थित सर्व कॅटरिंग परवानाधारकांनी सक्रिय सहभाग घेतला तसेच प्रवाशांना अधिक चांगल्या सुविधा उपलब्ध करून देण्याबाबत आपले विचार व सूचना मांडल्या. या बैठकीच्या माध्यमातून रेल्वे प्रशासन आणि कॅटरिंग परवानाधारक यांच्यातील समन्वय अधिक दृढ करण्यासोबतच सेवा गुणवत्तेत सातत्याने सुधारणा करण्याबाबत महत्त्वपूर्ण चर्चा झाली. या बैठकीस विभागीय रेल्वे व्यवस्थापक, भुसावळ यांनी मार्गदर्शन केले. यावेळी उप मुख्य वाणिज्य व्यवस्थापक (कॅटरिंग), मुख्यालय, वरिष्ठ विभागीय वाणिज्य व्यवस्थापक, भुसावळ तसेच सहायक वाणिज्य व्यवस्थापक (तिकीट तपासणी), भुसावळ यांच्यासह संबंधित अधिकारी उपस्थित होते.
