जळगाव (प्रतिनिधी) : रामानंद नगर पोलीस ठाण्याच्या हद्दीतील शिव कॉलनी परिसरात एमडी (मेफेड्रोन) अमली पदार्थ प्रकरणात स्थानिक गुन्हे शाखेने मोठा खुलासा केला आहे. याप्रकरणी यापूर्वी अटक करण्यात आलेल्या तरुणाच्या मोटारसायकलच्या सीटखाली त्याच्याच नातेवाईकाने एमडी पावडर ठेवून त्याला जाळ्यात अडकविल्याचा धक्कादायक प्रकार तपासात समोर आला आहे. या कटातील मुख्य सूत्रधारासह एमडी पावडर पुरविणाऱ्या आणखी एका आरोपीला पोलिसांनी अटक केली असून, दोघांना ५ ऑगस्ट २०२६ पर्यंत पोलीस कोठडी सुनावण्यात आली आहे. रामानंद नगर पोलीस ठाण्याच्या हद्दीतील शिव कॉलनी परिसरात २९ जुलै २०२६ रोजी कल्पेश सतीष रायसिंग (वय २६, रा. वालकी, ता. चोपडा, जि. जळगाव) याला एमडी अमली पदार्थासह अटक करण्यात आली होती. याप्रकरणी रामानंद नगर पोलीस ठाण्यात गुन्हा रजिस्टर क्रमांक २२१/२०२६ अन्वये एनडीपीएस कायदा १९८५ मधील कलम ८(क) व २२(ब) अंतर्गत गुन्हा दाखल करण्यात आला होता. या गुन्ह्याचा समांतर तपास करण्याचे आदेश पोलीस अधीक्षकांनी स्थानिक गुन्हे शाखेला दिले होते. गोपनीय माहिती आणि तांत्रिक तपासादरम्यान या प्रकरणामागील कथित कटकारस्थान उघडकीस आले. नातेवाईकानेच जळगावला बोलावल्याचा आरोप तपासादरम्यान कल्पेश रायसिंग याची सखोल चौकशी करण्यात आली. त्याने पोलिसांना सांगितले की, त्याचा नातेवाईक जतीन रविंद्र सैंदाणे (वय ३६, रा. नांदेड, ता. धरणगाव, जि. जळगाव; सध्या रा. नाशिक) हा १५ जुलै २०२६ रोजी अमळनेर येथे त्याला भेटला होता. त्यानंतर जतीन वारंवार जळगाव येथे हॉटेलमध्ये जेवणासाठी येण्याचा आग्रह करीत होता. या आग्रहानुसार कल्पेश २८ जुलै रोजी जळगावला आला. त्यानंतर रात्री उशिरा पोलिसांनी त्याला अडवून त्याच्या मोटारसायकलच्या सीटखालून एमडी पावडर जप्त केल्याचे सांगत अटक केली. मात्र, ही एमडी पावडर आपल्या मोटारसायकलच्या सीटखाली कशी आली, याची कोणतीही माहिती नसल्याचा दावा कल्पेशने चौकशी दरम्यान केला. शेअर मार्केटमधील तोट्यामुळे कर्जबाजारी; पैशांसाठी रचला कट? तांत्रिक तपास आणि गोपनीय माहितीच्या आधारे पोलिसांना जतीन सैंदाणे याच्यावर संशय बळावला. तपासात जतीन हा शेअर मार्केटमध्ये मोठी रक्कम गमावल्याने कर्जबाजारी झाल्याचे तसेच त्याला एमडी पावडरचे सेवन करण्याची सवय असल्याची माहिती समोर आली. पोलिसांनी जतीनची चौकशी केली असता, त्याने कथितपणे कटाची कबुली दिल्याचे तपासात नमूद करण्यात आले आहे. पैशांची गरज असल्याने त्याने चेतन दत्तात्रय वानखेडे उर्फ चंदू सोनार (वय ४१, रा. सराफ बाजार, राममंदिर वॉर्ड, भुसावळ) याच्याकडून एमडी पावडर घेतल्याचे सांगितले. त्यानंतर १५ जुलै रोजी अमळनेर येथे जाऊन कल्पेश रायसिंग याच्या मोटारसायकल क्रमांक एमएच-१९-सीसी-५०१६ च्या सीटखाली एमडी पावडर ठेवल्याचा आरोप आहे. त्यानंतर २८ जुलै रोजी कल्पेशला जेवणाच्या बहाण्याने जळगावला बोलावून त्याच्या मोटारसायकलमध्ये एमडी पावडर असल्याची माहिती पोलिसांना दिल्याचेही तपासात समोर आले आहे. कारवाईच्या नावाखाली ‘तोडीपाणी’ करून हिस्सा मिळविण्याचा कथित डाव पोलिसांच्या तपासानुसार, मोटारसायकल अडविल्यानंतर कल्पेशवर थेट कायदेशीर कारवाई न करता ‘तोडीपाणी’ होईल आणि त्यातील अर्धा हिस्सा मिळेल, असा जतीनचा कथित उद्देश होता. तसेच पोलिसांशी आपली ओळख असल्याचे भासवून कल्पेशच्या वडिलांकडून पैसे उकळण्याचाही त्याचा कथित इरादा होता. मात्र, पोलिसांनी मोटारसायकलची तपासणी करून एमडी पावडर जप्त केली आणि कल्पेशविरुद्ध कायदेशीर कारवाई केली. त्यानंतर झालेल्या सखोल तपासात संपूर्ण कट उघडकीस आल्याचे पोलिसांनी सांगितले. दोघांना अटक; बीएनएस कलम ६१(२) वाढविले तपासात संशयित आरोपी जतीन रविंद्र सैंदाणे आणि चेतन दत्तात्रय वानखेडे उर्फ चंदू सोनार यांचा या गुन्ह्यात सहभाग निष्पन्न झाल्याने दोघांना अटक करण्यात आली आहे. हा प्रकार कथित गुन्हेगारी कटकारस्थानातून घडल्याचे निष्पन्न झाल्याने भारतीय न्याय संहिता (बीएनएस) मधील कलम ६१(२) देखील गुन्ह्यात वाढविण्यात आले आहे. दोन्ही आरोपींना न्यायालयात हजर केले असता, न्यायालयाने त्यांना ५ ऑगस्ट २०२६ पर्यंत पोलीस कोठडी सुनावली आहे. ही कारवाई जळगावचे पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली. स्थानिक गुन्हे शाखेचे वरिष्ठ पोलीस निरीक्षक राहुल गायकवाड, रामानंद नगर पोलीस ठाण्याचे पोलीस निरीक्षक मधुकर साळवे, तपासी अधिकारी पोलीस उपनिरीक्षक संजय तडवी तसेच स्थानिक गुन्हे शाखा आणि रामानंद नगर पोलीस ठाण्यातील अधिकारी व अंमलदारांनी तपासात महत्त्वपूर्ण भूमिका बजावली.
