भुसावळ (प्रतिनिधी ) – भुसावळ विभागात ६९ वा रेल्वे सप्ताह २०२४ उत्साहात साजरा करण्यात आला. या विशेष कार्यक्रमाचा उद्देश रेल्वे कर्मचाऱ्यांमध्ये उत्कृष्ट कार्यपद्धतींना प्रोत्साहन देणे तसेच उत्कृष्ट कामगिरी करणाऱ्या कर्मचाऱ्यांचा सन्मान करून त्यांना प्रेरित करणे हा होता. या निमित्ताने उत्कृष्ट कामगिरी करणाऱ्या कर्मचाऱ्यांना रेल्वे सेवा पुरस्कार आणि विभागीय पातळीवर विशेष योगदान देणाऱ्या युनिट्सना गौरवचिन्हे (शिल्ड) प्रदान करण्यात आली.
या समारंभाचे उद्घाटन भुसावळ विभागीय रेल्वे व्यवस्थापक (डीआरएम) श्रीमती इति पांडेय यांच्या हस्ते दीपप्रज्वलन करून करण्यात आले. त्यांनी आपल्या भाषणात भुसावळ विभागाच्या यशस्वी वाटचालीवर प्रकाश टाकला आणि रेल्वे कर्मचाऱ्यांच्या योगदानाचे कौतुक केले. तसेच, भविष्यातही उत्कृष्ट सेवा प्रदान करण्याचे आवाहन केले.
कार्यक्रमादरम्यान विविध सांस्कृतिक कार्यक्रमांचे आयोजन करण्यात आले, ज्यामध्ये रेल्वे कर्मचाऱ्यांसह त्यांच्या कुटुंबीयांनीही उत्स्फूर्त सहभाग घेतला.
रेल्वे सप्ताहानिमित्त अतिविशिष्ट आणि विशिष्ट रेल सेवा पुरस्कार प्राप्त ०५ अधिकारी व १३ कर्मचाऱ्यांचा विशेष सत्कार करण्यात आला. एकूण १६५ रेल्वे कर्मचाऱ्यांना प्रशस्तीपत्र देऊन सन्मानित करण्यात आले. तसेच, भुसावळ विभागातील १८ डेपोना शिल्ड व १८ गटांना रोख बक्षिसे देण्यात आली.
कार्यक्रमाची प्रस्तावना श्री एन. एस. काजी, वरिष्ठ मंडळ कार्मिक अधिकारी, यांनी केली. त्यांनी रेल्वे सप्ताह आयोजित करण्यामागील उद्देश स्पष्ट केला आणि कर्मचार्यांना अधिक प्रेरणा देण्यावर भर दिला. कार्यक्रमाचे सूत्रसंचालन पुष्पेंद्र कापडे यांनी केले.
या कार्यक्रमास सुनील कुमार सुमन, अप्पर विभागीय रेल्वे व्यवस्थापक (प्रशासन), एम. के. मीना, अप्पर विभागीय रेल्वे व्यवस्थापक (तांत्रिक), सर्व शाखांचे अधिकारी, मंडळ महिला कल्याण समितीचे सदस्य, युनियन पदाधिकारी व कर्मचारी मोठ्या संख्येने उपस्थित होते.
६९ वा रेल्वे सप्ताह २०२४ हा भुसावळ रेल्वे विभागासाठी प्रेरणादायी ठरला. या उपक्रमामुळे रेल्वे कर्मचार्यांचे मनोबल उंचावले गेले आणि त्यांच्या उत्कृष्ट कार्याचा गौरव करण्यात आला. भविष्यातही रेल्वे विभाग उत्कृष्ट सेवा देत राहील, असा विश्वास विभागीय रेल्वे व्यवस्थापक श्रीमती इति पांडेय यांनी व्यक्त केला.
