नवरात्रोत्सवात गोमाता आणि नंदीदेवांना कत्तलीपासून वाचविण्याचे आवाहन; धार्मिक श्रद्धा आणि भारतीय कृषी संस्कृतीचे जतन करण्याचा संदेश
भुसावळ (प्रतिनिधी)- शारदीय नवरात्रोत्सव हा आदिशक्तीच्या नऊ रूपांची आराधना करण्याचा, उपवास व पूजाअर्चा करून देवीचा आशीर्वाद प्राप्त करण्याचा पवित्र काळ आहे. या उत्सवात माता दुर्गेच्या विविध स्वरूपांची पूजा केली जाते. मात्र, देवीची खरी भक्ती केवळ पूजाअर्चेपुरती मर्यादित न ठेवता मुक्या प्राण्यांचे रक्षण, त्यांची सेवा आणि त्यांच्याप्रती करुणा व्यक्त करण्यातही आहे. गोमाता आणि नंदीदेवांना कत्तलीपासून वाचविणे, त्यांचे संगोपन करणे आणि त्यांना जीवदान देणे, हीच देवीच्या नऊ रूपांप्रती श्रद्धा व्यक्त करण्याची एक महत्त्वपूर्ण सेवा असल्याचा संदेश दिला जात आहे. धार्मिक श्रद्धेनुसार गोमातेला विशेष महत्त्व भारतीय संस्कृतीत गोमातेला अत्यंत पवित्र स्थान आहे. धार्मिक मान्यतेनुसार गाईच्या शरीरात ३३ कोटी देवतांचा वास असतो. त्यामुळे गोमातेची सेवा आणि पूजा केल्याने पुण्यप्राप्ती होते व देवतांचे आशीर्वाद लाभतात, अशी भाविकांची श्रद्धा आहे. गाय दूध, गोमूत्र आणि शेण देते. पारंपरिक भारतीय जीवनपद्धतीत या गोवंशजन्य पदार्थांना धार्मिक, कृषी आणि विविध उपयोगांसाठी महत्त्वाचे स्थान आहे. नवरात्रोत्सवाच्या पवित्र काळात आपल्या कुटुंबावर देवीची कृपा व्हावी, सर्वांना सुख, शांती, आरोग्य आणि आनंद लाभावा, अशी प्रत्येक भाविकाची इच्छा असते. अशा वेळी गोमाता आणि नंदीदेवांचे रक्षण करून त्यांची सेवा करणे, हा करुणा, दया आणि जीवमात्रांप्रती कृतज्ञता व्यक्त करण्याचा मार्ग आहे. नंदीदेव हा बळीराजाचा खरा सोबती भारतीय कृषी संस्कृतीमध्ये बैल अर्थात नंदीदेवाला विशेष महत्त्व आहे. पारंपरिक शेतीमध्ये शेत नांगरणे, पेरणी करणे आणि इतर कृषी कामांसाठी बैलांनी महत्त्वपूर्ण योगदान दिले आहे. शेतकऱ्यांच्या जीवनात गोवंशाचे स्थान केवळ धार्मिक नसून आर्थिक आणि सांस्कृतिकदृष्ट्याही महत्त्वाचे राहिले आहे. त्यामुळे गोवंशाचे संरक्षण करणे म्हणजे भारतीय कृषी परंपरेचे आणि संस्कृतीचे जतन करणे होय. १९ वर्षांपासून मुक्या जीवांच्या रक्षणासाठी अविरत सेवा मागील १९ वर्षांपासून संकटात सापडलेल्या आणि कत्तलीच्या धोक्यात असलेल्या अनेक गाईंचे रक्षण करून त्यांना जीवदान देण्याचे कार्य गोसेवक रोहित महाले यांचे अविरतपणे सुरू आहे. मुक्या प्राण्यांच्या वेदना समजून घेऊन त्यांना सुरक्षितता मिळवून देणे, त्यांचे संगोपन करणे आणि त्यांच्या जीवनाचे संरक्षण करणे, हे या सेवाकार्याचे प्रमुख उद्दिष्ट आहे. या कार्यातून प्राणीमात्रांप्रती दया, करुणा आणि सेवाभावाचा आदर्श समाजासमोर ठेवण्यात येत आहे. नवरात्रोत्सवात गोसेवेचा संकल्प करूया नवरात्रोत्सवाच्या निमित्ताने प्रत्येकाने आपल्या परीने गोमाता आणि नंदीदेवांच्या संरक्षणासाठी पुढाकार घ्यावा. संकटात सापडलेल्या प्राण्यांना मदत करावी, त्यांच्या संगोपनासाठी सहकार्य करावे आणि कायद्याच्या चौकटीत राहून गोवंश संरक्षणाच्या कार्याला हातभार लावावा. असे आवाहन महाले यांनी केले गोमाता व नंदीदेवांचे रक्षण म्हणजे केवळ प्राण्यांचे संरक्षण नव्हे, तर दया, करुणा, संस्कृती आणि मानवतेच्या मूल्यांचे जतन होय. आदिशक्तीच्या नऊ रूपांची आराधना करताना मुक्या जीवांच्या सेवेतूनही देवीचा आशीर्वाद प्राप्त होवो, हीच नवरात्रोत्सवाच्या पवित्र पर्वातील मंगल भावना.
