भुसावळ (प्रतिनिधी) : महिला सक्षमीकरणाला चालना देण्यासाठी आणि महिलांच्या कलागुणांना, कौशल्यांना तसेच उद्योजकीय क्षमतेला प्रोत्साहन देण्याच्या उद्देशाने प्रतिष्ठा महिला मंडळाच्या वतीने दिवाळी सणाच्या पार्श्वभूमीवर ब्राह्मण संघ, भुसावळ येथे आयोजित महिला उद्योजक मेळाव्याचे उद्घाटन आज मोठ्या उत्साहात आणि थाटात संपन्न झाले. या उपक्रमाच्या माध्यमातून महिला उद्योजिकांना आपल्या उत्पादनांच्या विक्रीसाठी हक्काचे व्यासपीठ उपलब्ध झाले असून महिलांची दिवाळी गोड करण्याचा स्तुत्य प्रयत्न करण्यात आला आहे. या मेळाव्याचे उद्घाटन राज्याचे वस्त्रोद्योग मंत्री ना. संजयभाऊ सावकारे यांच्या हस्ते करण्यात आले. यावेळी प्रतिष्ठा महिला मंडळाच्या अध्यक्षा सौ. रजनीताई सावकारे आणि भुसावळ नगरीच्या प्रभारी नगराध्यक्षा सौ. शैलजाताई नारखेडे यांच्या प्रमुख उपस्थितीत दीपप्रज्वलन करून मेळाव्याचा शुभारंभ करण्यात आला. उद्घाटनप्रसंगी ना. संजयभाऊ सावकारे यांनी मेळाव्यात सहभागी झालेल्या महिला उद्योजिकांना शुभेच्छा दिल्या. तसेच विविध स्टॉल्सना भेट देऊन महिलांनी तयार केलेल्या नाविन्यपूर्ण उत्पादनांची पाहणी केली आणि आयोजकांसोबत संवाद साधला. महिलांनी उद्योग-व्यवसायाच्या क्षेत्रात पुढे येऊन आर्थिकदृष्ट्या स्वावलंबी व्हावे, यासाठी अशा उपक्रमांचे महत्त्व अधोरेखित झाले. २०० हून अधिक स्टॉल्स ठरत आहेत आकर्षणाचे केंद्र! यंदाच्या मेळाव्यात २०० हून अधिक स्टॉल्स उभारण्यात आले असून त्यामध्ये महिलांनी तयार केलेल्या विविध नाविन्यपूर्ण वस्तू आणि उत्पादनांचा समावेश आहे. दिवाळी फराळ, गृहसजावटीच्या वस्तू, आकर्षक भेटवस्तू, कपडे, दागिने, हस्तकला आणि विविध प्रकारच्या घरगुती उत्पादनांची येथे रेलचेल पाहायला मिळत आहे. महिला उद्योजिकांना आपल्या उत्पादनांची विक्री, प्रसिद्धी आणि ग्राहकांशी थेट संपर्क साधण्याची संधी या मेळाव्यामुळे उपलब्ध झाली आहे. महिला पदाधिकारी व मान्यवरांची उपस्थिती या उद्घाटन सोहळ्याला नगरसेविका सोनलताई महाजन, अनिता आंबेकर, मेघा वाणी, आशा पाटील,छाया देशमुख, प्रीती पाटील, मीनाक्षी धांडे, प्रिया बोधराज चौधरी, प्राची पाटील, अर्चना सातदिवे, सीमा नरवाडे, श्यामल झांबरे, जिल्हा सरचिटणीस परीक्षित बऱ्हाटे यांच्यासह विविध क्षेत्रांतील मान्यवर, महिला उद्योजिका आणि नागरिक उपस्थित होते. १ नोव्हेंबरपर्यंत प्रदर्शन सुरू राहणार प्रतिष्ठा महिला मंडळाच्या वतीने आयोजित हा महिला उद्योजक मेळावा येत्या १ नोव्हेंबर २०२६ पर्यंत ब्राह्मण संघ, भुसावळ येथे सुरू राहणार आहे. महिला उद्योजिकांना प्रोत्साहन देणारा, त्यांच्या उत्पादनांना बाजारपेठ उपलब्ध करून देणारा आणि महिलांना आर्थिक स्वावलंबनाच्या दिशेने प्रेरित करणारा हा उपक्रम निश्चितच कौतुकास्पद ठरत आहे. भुसावळकर नागरिकांनी या मेळाव्याला आवर्जून भेट देऊन महिला उद्योजिकांच्या उत्पादनांना प्रतिसाद द्यावा, असे आवाहन करण्यात येत आहे.
