भुसावळ (प्रतिनिधी) : पोलीस दलात सेवा बजावण्याचे स्वप्न उराशी बाळगणाऱ्या युवक-युवतींना योग्य मार्गदर्शन मिळावे, या उद्देशाने जळगाव जिल्हा पोलीस दलाच्या वतीने गुरुवार, दि. २९ ऑक्टोबर २०२६ रोजी रेल्वे ग्राउंड, भुसावळ येथे पोलीस भरतीपूर्व प्रशिक्षण शिबिराचे आयोजन करण्यात आले. सायंकाळी ४ वाजता सुरू झालेल्या या शिबिराला परिसरातील शेकडो युवक-युवतींनी उपस्थिती लावत उत्स्फूर्त प्रतिसाद दिला. जळगाव जिल्ह्याचे पोलीस अधीक्षक श्रीकांत धिवरे यांच्या संकल्पनेतून आणि भुसावळचे उपविभागीय पोलीस अधिकारी केदार बारबोले यांच्या मार्गदर्शनाखाली या शिबिराचे आयोजन करण्यात आले होते. महाराष्ट्र राज्याचे वस्त्रोद्योग मंत्री संजय सावकारे हे प्रमुख अतिथी म्हणून उपस्थित होते. तसेच जळगावचे अपर पोलीस अधीक्षक संदीप गावित यांची प्रमुख उपस्थिती होती. मैदानी चाचणी, लेखी परीक्षा आणि कागदपत्रांबाबत मार्गदर्शन शिबिरात उपस्थित पोलीस अधिकारी आणि प्रशिक्षकांनी पोलीस भरती प्रक्रियेच्या विविध टप्प्यांबाबत उमेदवारांना सविस्तर मार्गदर्शन केले. मैदानी चाचणी, लेखी परीक्षा आणि आवश्यक कागदपत्रांची पूर्तता या महत्त्वाच्या बाबींवर विशेष भर देण्यात आला. मैदानी चाचणीची तयारी : धावणे आणि इतर शारीरिक चाचण्यांमध्ये अधिकाधिक गुण मिळविण्यासाठी आवश्यक सराव, शारीरिक क्षमता व स्टॅमिना वाढविण्याच्या पद्धती तसेच सरावाचे योग्य नियोजन याबाबत प्रत्यक्ष प्रात्यक्षिकांसह माहिती देण्यात आली. लेखी परीक्षेचे नियोजन : बदलत्या अभ्यासक्रमाचे स्वरूप, वेळेचे व्यवस्थापन, सामान्य ज्ञान, बुद्धिमत्ता चाचणी आणि गणित या विषयांची प्रभावी तयारी कशी करावी, याविषयी उमेदवारांना उपयुक्त टिप्स देण्यात आल्या. कागदपत्रांची पूर्तता : भरती प्रक्रियेदरम्यान कागदपत्रांतील त्रुटींमुळे अडचणी निर्माण होऊ नयेत, यासाठी आवश्यक प्रमाणपत्रे आणि इतर कागदपत्रांची पूर्तता योग्य पद्धतीने करण्याबाबत मार्गदर्शन करण्यात आले. वरिष्ठ पोलीस अधिकारी उपस्थित या शिबिराला भुसावळ तालुक्याचे प्रभारी परिविक्षाधीन पोलीस उपअधीक्षक प्रशांत दरेकर, भुसावळ शहर पोलीस स्टेशनचे पोलीस निरीक्षक महेश गायकवाड, बाजारपेठ पोलीस स्टेशनचे पोलीस निरीक्षक राहुल वाघ, पोलीस निरीक्षक निलेश गायकवाड, जळगाव पोलीस मुख्यालयाचे राखीव पोलीस निरीक्षक प्रशांत सुग्रवार, शहर वाहतूक शाखेचे सहाय्यक पोलीस निरीक्षक राहुल भंडारे, सहाय्यक पोलीस निरीक्षक शत्रुघ्न पाटील आणि पोलीस उपनिरीक्षक विजय कोळी यांच्यासह अन्य अधिकारी उपस्थित होते. कठोर परिश्रम आणि शिस्तीचे पालन करण्याचे आवाहन पोलीस भरतीसाठी इच्छुक असलेल्या ग्रामीण व शहरी भागातील युवक-युवतींनी शिस्तीचे पालन करून नियमित सराव, अभ्यास आणि कठोर परिश्रमांच्या माध्यमातून आपले ध्येय साध्य करावे, असे आवाहन उपस्थित मान्यवरांनी केले. या शिबिरामुळे पोलीस भरतीची तयारी करणाऱ्या उमेदवारांना भरती प्रक्रियेची माहिती, अभ्यासाचे नियोजन आणि शारीरिक चाचण्यांच्या तयारीबाबत मार्गदर्शन मिळाले. उपस्थित युवक-युवतींनी या उपक्रमाबद्दल समाधान व्यक्त केले.
