नाशिक प्रतिनिधी : कळवण तालुक्यातील श्री सप्तशृंगी गडावर होणाऱ्या नवरात्रोत्सव आणि कोजागिरी पौर्णिमा उत्सवाच्या पार्श्वभूमीवर नाशिक ग्रामीण पोलिसांकडून व्यापक सुरक्षा व्यवस्था तैनात करण्यात आली आहे. ११ ते २० ऑक्टोबरदरम्यान मुख्य नवरात्रोत्सव, तर २५ ते २७ ऑक्टोबरदरम्यान कोजागिरी पौर्णिमा उत्सव पार पडणार आहे. या कालावधीत तब्बल १३ ते १४ लाख भाविक दर्शनासाठी येण्याचा अंदाज असून, गर्दीचे नियोजन आणि कायदा व सुव्यवस्था अबाधित ठेवण्यासाठी १,५०० हून अधिक पोलिस अधिकारी व कर्मचाऱ्यांची नियुक्ती करण्यात आली आहे. वरिष्ठ अधिकाऱ्यांसह पोलिसांचा मोठा फौजफाटा उत्सवाच्या कालावधीत सुरक्षा व्यवस्थेवर देखरेख ठेवण्यासाठी १ अपर पोलिस अधीक्षक, २ उपविभागीय पोलिस अधिकारी आणि १७ पोलिस निरीक्षकांसह मोठ्या संख्येने पोलिस अधिकारी व कर्मचारी तैनात असणार आहेत. भाविकांची गर्दी नियंत्रित करणे, वाहतुकीचे नियोजन, दर्शन रांगेचे व्यवस्थापन आणि अनुचित प्रकारांना आळा घालण्यावर पोलिस प्रशासनाचा भर राहणार आहे. ३११ सीसीटीव्ही कॅमेऱ्यांद्वारे चोवीस तास देखरेख संपूर्ण सप्तशृंगी गड परिसरात ३११ सीसीटीव्ही कॅमेऱ्यांच्या माध्यमातून चोवीस तास देखरेख ठेवली जाणार आहे. याशिवाय सुरक्षा व्यवस्थेसाठी २५ वॉकी-टॉकी संच आणि गर्दीचे नियोजन करण्यासाठी २०० बॅरिकेड्सची व्यवस्था करण्यात आली आहे. आपत्कालीन परिस्थितीत तातडीने मदत उपलब्ध व्हावी, यासाठी पाच रुग्णवाहिकाही सज्ज ठेवण्यात येणार आहेत. भाविकांच्या सुरक्षिततेला प्राधान्य नवरात्रोत्सवाच्या काळात राज्याच्या विविध भागांतून तसेच महाराष्ट्राबाहेरूनही मोठ्या संख्येने भाविक सप्तशृंगी देवीच्या दर्शनासाठी येतात. त्यामुळे गडावरील गर्दीचे व्यवस्थापन, वाहतूक नियंत्रण, आपत्कालीन मदत आणि सुरक्षेच्या दृष्टीने पोलिस प्रशासनाकडून विशेष नियोजन करण्यात आले आहे. आधुनिक सुरक्षा यंत्रणा आणि मोठ्या पोलिस बंदोबस्ताच्या माध्यमातून उत्सव शांततेत पार पाडण्याचे नियोजन करण्यात आले आहे. सप्तशृंगी गडावरील नवरात्रोत्सवासाठी प्रशासनाकडून करण्यात आलेल्या या व्यापक तयारीमुळे भाविकांच्या सुरक्षिततेसह उत्सवाचे सुरळीत आयोजन करण्यावर भर दिला जाणार आहे.
