मुक्ताईनगर – मुक्ताईनगर तालुक्यातील एका गावात अल्पवयीन मुलीचा विनयभंग झाल्याची धक्कादायक घटना उघडकीस आली आहे. २८ मार्च २०२६ रोजी समोर आलेल्या या प्रकारामुळे परिसरात एकच खळबळ उडाली असून, पोलिसांनी तात्काळ कारवाई करत आरोपीला अटक केली आहे.
मिळालेल्या माहितीनुसार, संबंधित मुलगी शालेय साहित्य खरेदी करण्यासाठी गावातील एका दुकानात गेली होती. यावेळी दुकानाच्या मालकाने तिच्याशी गैरवर्तन करत विनयभंग केल्याचा गंभीर आरोप करण्यात आला आहे. अचानक घडलेल्या या प्रकारामुळे घाबरलेल्या मुलीने घरी परतल्यानंतर कुटुंबीयांना संपूर्ण घटना सांगितली.
घटनेची माहिती मिळताच कुटुंबीयांनी तात्काळ पोलीस ठाण्यात धाव घेत तक्रार दाखल केली. पोलिसांनीही तत्परता दाखवत गुन्हा नोंदवून तपास सुरू केला. तपासादरम्यान आरोपीचा शोध घेत संशयित आरोपी संजय विश्वनाथ म्हसाने याला अल्पावधीतच ताब्यात घेऊन अटक करण्यात आली.
या प्रकरणी आरोपीविरुद्ध भारतीय न्याय संहिता (BNS 2023) अंतर्गत कलम 74, 75(1), 351(2) तसेच पॉक्सो कायद्यांतर्गत कलम 8 व 12 नुसार गुन्हा दाखल करण्यात आला आहे. अल्पवयीनांवरील अत्याचाराच्या घटनांकडे गांभीर्याने पाहत पोलिसांनी कठोर कारवाईचा इशारा दिला आहे.
दरम्यान, या घटनेनंतर नागरिकांमध्ये संताप व्यक्त होत असून, पोलिसांनी दाखवलेल्या तत्पर कारवाईबद्दल समाधानही व्यक्त केले जात आहे. पुढील तपास सुरू आहे.
