भुसावळ (२७ जुलै प्रतिनिधी ) – विभागातील क्रीडा पायाभूत सुविधेला चालना देताना, भुसावळ येथील रेल्वे क्रीडा मैदानामध्ये IAAF (इंटरनॅशनल असोसिएशन ऑफ ॲथलेटिक्स फेडरेशन्स) च्या मानकांनुसार अत्याधुनिक सिंथेटिक रनिंग ट्रॅकची उभारणी करण्यात आली आहे. यापूर्वी येथे मातीच्या ट्रॅकवर मर्यादित स्वरूपातच क्रियाकलाप होत असत. या नव्या विकासामुळे भुसावळ विभागात व्यावसायिक ॲथलेटिक्सना नवे दालन खुले झाले आहे.
या प्रकल्पासाठी क्रीडा शुल्क निधीतून रु. 1.00 कोटींच्या खर्चास सक्षम प्राधिकाऱ्यांकडून मंजूरी देण्यात आली आहे. हा ट्रॅक जळगाव जिल्ह्यातील पहिला आणि महाराष्ट्रातील नववा सिंथेटिक ट्रॅक असून, प्रादेशिक क्रीडा विकासाच्या दिशेने ही एक महत्त्वपूर्ण उपलब्धी आहे.
उन्नत क्रीडा संकुलाची वैशिष्ट्ये:
-एकूण क्षेत्रफळ : 18,376 चौ. मीटर
-रनिंग/मॅरेथॉन ट्रॅक : 400 मीटर (इनर सर्कल परिघ)
-लेन्सची संख्या : 5
-प्रेक्षक क्षमतेची बैठक व्यवस्था : 340
-ओपन ग्रीन जिम : आरोग्य व तंदुरुस्तीसाठी विशेष सुविधा
या ट्रॅकचे परीक्षण तज्ज्ञांकडून करण्यात आले असून तो व्यावसायिक स्पर्धांसाठी योग्य असल्याचे प्रमाणित झाले आहे. हा ट्रॅक आता रेल्वे व इतर बाह्य खेळाडूंकरिता उपलब्ध आहे –
-रेल्वे कर्मचाऱ्यांसाठी व त्यांच्या कुटुंबीयांसाठी शुल्क : ₹100
-बाह्य खेळाडूंकरिता शुल्क : ₹400
समावेशकतेला प्रोत्साहन देण्यासाठी भुसावळ विभागातील आदिवासी शाळांमधील विद्यार्थ्यांसाठी ही सुविधा पूर्णतः मोफत ठेवण्यात आली आहे. अन्य शाळांतील विद्यार्थी आणि खेळाडू देखील अत्यल्प शुल्कामध्ये या सुविधेचा लाभ घेऊ शकतात. विशेष म्हणजे, आदिवासी विद्यार्थ्यांसाठी नियमितपणे क्रीडा स्पर्धांचे आयोजन करून त्यांच्या कौशल्यांना व्यासपीठ देण्याचा उपक्रम रेल्वे प्रशासनाद्वारे हाती घेण्यात आला आहे.
राष्ट्रीय प्रशिक्षण केंद्राची संकल्पना –
या अत्याधुनिक ट्रॅकच्या उभारणीमुळे भुसावळ रेल्वे क्रीडा मैदानाला भविष्यात एक राष्ट्रीय प्रशिक्षण केंद्र म्हणून विकसित करण्याचा विचार असून, येथे राष्ट्रीय व आंतरराष्ट्रीय दर्जाच्या स्पर्धांचे आयोजन होऊ शकणार आहे. ही जागतिक दर्जाची अधोसंरचना देशभरातील युवा ॲथलीट्ससाठी आकर्षण ठरेल तसेच स्थानिक पातळीवरील कौशल्यांना घासून-पुसून घ्यायला मदत करेल.
भुसावळ (चांदमारी) येथे स्वतंत्र मल्टी-स्पोर्ट्स ग्राउंडचा विकास
मुख्य रेल्वे क्रीडा मैदानात आता फक्त ट्रॅकसंबंधित क्रियाकलापांपुरते मर्यादित असल्याने, इतर खेळांसाठी भुसावळच्या चांदमारी भागात स्वतंत्र मल्टी-स्पोर्ट्स ग्राउंड विकसित करण्यात आले आहे. येथे क्रिकेट, फुटबॉल, हॉकी, कबड्डी, ग्राउंड टेनिस अशा विविध खेळांसाठी योग्य सुविधा उभारण्यात आल्या आहेत. या प्रकल्पासाठी देखील क्रीडा शुल्क निधीतून ₹1.00 कोटींपर्यंत निधी मंजूर करण्यात आला आहे.
या ठिकाणी पूर्वी रेल्वे कॉलनी होती, जिथे 34 प्रौढ वृक्ष होते. पर्यावरणाच्या प्रति जबाबदारी स्वीकारत, रेल्वे प्रशासनाने जिल्हा वन विभागाच्या समन्वयाने –
-संयुक्त सर्वेक्षण व तपासणी
-वृक्षांचे मूल्यमापन व लिलाव
-मैदान सुरु होण्यापूर्वी वृक्षारोपणाचा संकल्प
या टप्प्यांतील सर्व प्रक्रिया पार पाडल्या आहेत.
द्विस्तरीय विकास – खेळ संस्कृतीला चालना
मुख्य ट्रॅक सुविधेचा उन्नतीकरण आणि नवीन मल्टी-स्पोर्ट्स ग्राउंडच्या विकासाच्या या द्विस्तरीय योजनेमुळे भुसावळ विभागात सर्वांगीण क्रीडा अधोसंरचना उपलब्ध झाली आहे. ही योजना भारतीय रेल्वेच्या क्रीडा संस्कृती, आरोग्य व तंदुरुस्तीला चालना देण्याच्या कटिबद्धतेचे प्रतीक आहे. या पुढाकारामुळे केवळ स्थानिक खेळाडूंनाच प्रोत्साहन मिळणार नाही, तर भुसावळ हे एक सशक्त व जिवंत क्रीडा केंद्र म्हणून उदयास येईल.
