भुसावळ (प्रतिनिधी) : भुसावळ शहरातील साईपुष्प हॉस्पिटल सुप्रसिद्ध अस्थिरोग तज्ञ डॉ निलेश महाजन यांचे सुपुत्र अथर्व निलेश महाजन यांनी शैक्षणिक क्षेत्रात उल्लेखनीय यश संपादन केले आहे. जगातील प्रतिष्ठित विद्यापीठांपैकी एक असलेल्या ऑक्सफर्ड विद्यापीठातून त्यांनी फिजिक्स विषयात फर्स्ट क्लास मिळवत ‘मास्टर ऑफ फिजिक्स’ ही पदवी प्राप्त केली आहे. अथर्व निलेश महाजन यांनी ऑक्सफर्ड विद्यापीठाच्या Final Honour School of Physics मध्ये उत्कृष्ट कामगिरी करत फर्स्ट क्लास मिळविला. विद्यापीठाने जारी केलेल्या प्रमाणपत्रानुसार त्यांनी St Hilda’s College येथे फिजिक्सचे शिक्षण पूर्ण केले. २२ जुलै २०२६ रोजी झालेल्या परीक्षेत परीक्षकांच्या निकषांवर समाधानकारक कामगिरी करत त्यांनी फर्स्ट क्लास प्राप्त केला. यानंतर विद्यापीठाच्या निर्धारित सर्व अटी पूर्ण केल्यानंतर ८ ऑगस्ट २०२६ रोजी त्यांना ‘Master of Physics’ पदवी प्रदान करण्यात आली. फिजिक्ससारख्या आव्हानात्मक विषयात ऑक्सफर्ड विद्यापीठातून फर्स्ट क्लाससह पदवी संपादन करणे ही निश्चितच भुसावळसह जळगाव जिल्ह्यासाठी अभिमानाची बाब आहे. अथर्व यांच्या या उल्लेखनीय यशामुळे त्यांच्या कुटुंबीयांसह शिक्षक, मित्रपरिवार आणि शुभचिंतकांमध्ये आनंदाचे वातावरण आहे. त्यांच्या मेहनतीची, चिकाटीची आणि शैक्षणिक गुणवत्तेची ही यशस्वी पावती मानली जात आहे. आंतरराष्ट्रीय स्तरावरील प्रतिष्ठित विद्यापीठात फिजिक्समध्ये उत्कृष्ट कामगिरी करून पदवी संपादन करणाऱ्या अथर्व महाजन यांची ही उपलब्धी युवा विद्यार्थ्यांसाठी प्रेरणादायी ठरणारी आहे. सातत्यपूर्ण प्रयत्न, मेहनत आणि गुणवत्तापूर्ण शिक्षणाच्या जोरावर विद्यार्थी जागतिक स्तरावरही आपली वेगळी ओळख निर्माण करू शकतात, हे त्यांनी आपल्या यशातून सिद्ध केले आहे. अथर्व निलेश महाजन यांच्या या शानदार यशाबद्दल त्यांचे सर्व स्तरांतून अभिनंदन होत असून, त्यांच्या पुढील शैक्षणिक व वैज्ञानिक वाटचालीसाठी शुभेच्छांचा वर्षाव होत आहे.
