भुसावळ, दि. ५ ऑगस्ट : भुसावळ विभागीय रेल्वे उपयोगकर्ता सल्लागार समितीची (DRUCC) १७६ वी बैठक बुधवारी मंडल रेल्वे कार्यालय, भुसावळ येथे संपन्न झाली. बैठकीच्या प्रारंभी वरिष्ठ विभागीय वाणिज्य व्यवस्थापक श्री अजय कुमार यांनी उपस्थित सर्व सदस्यांचे हार्दिक स्वागत केले. बैठकीदरम्यान समिती सदस्यांनी आपापल्या क्षेत्रातील प्रवासी सुविधांमध्ये सुधारणा, रेल्वेसंबंधित समस्यांचे तातडीने निराकरण तसेच प्रवाशांना अधिक चांगल्या सेवा उपलब्ध करून देण्याच्या दृष्टीने विविध विषयांवर सकारात्मक व रचनात्मक चर्चा केली. विभागीय रेल्वे व्यवस्थापक श्री पुनीत अग्रवाल यांनी भुसावळ विभागात सुरू असलेल्या विविध योजना व उपक्रमांची सविस्तर माहिती सदस्यांना दिली. प्रवासी सुविधांचा विकास हा भुसावळ विभागाचा सर्वोच्च प्राधान्यक्रम असून, त्या दृष्टीने सातत्याने प्रयत्न सुरू असल्याचे त्यांनी सांगितले. येत्या काळात या प्रयत्नांचे ठोस व सकारात्मक परिणाम दिसून येतील, असा विश्वासही त्यांनी व्यक्त केला. समिती सदस्यांनी मांडलेल्या योग्य व व्यवहार्य मागण्यांवर लवकरात लवकर कार्यवाही करण्यात येईल, असे आश्वासनही श्री अग्रवाल यांनी दिले. बैठकीत भुसावळ विभागाने अलीकडच्या काळात प्राप्त केलेल्या विविध उपलब्धी तसेच प्रवासी सुविधांमध्ये करण्यात आलेल्या सुधारणांची माहिती सादर करण्यात आली. यावेळी सदस्यांनी आपापल्या क्षेत्रातील रेल्वेसंबंधित समस्या, नवीन गाड्यांचे संचालन, गाड्यांच्या थांब्यांमध्ये वाढ, गाड्यांचा विस्तार तसेच रेल्वे स्थानकांवर प्रवाशांसाठी अधिक चांगल्या सुविधा उपलब्ध करून देण्याबाबत मौल्यवान सूचना मांडल्या. बैठकीस श्री अनिरुद्ध कुलकर्णी, श्री श्रीकांत सराफ, श्री यशवंत जसूद, श्री राजेश भराडे (भुसावळ), श्री अशोक अग्रवाल (मलकापूर), श्री जितेंद्र देशमुख (चाळीसगाव), श्रीमती माधुरी शर्मा (शेगाव), श्री राजनारायण मिश्रा, श्री उन्मेष मालू, श्री नीरव वोरा (अकोला), श्री पंकज नाटानी (बुरहानपूर), श्री संजय सोनवणे, डॉ. यती पाटील (नाशिक), श्री विजय मोहरीर (जळगाव), श्री मनीष करवा (अमरावती) आणि श्री भूपेंद्र जैन (लासलगाव) आदी सदस्य उपस्थित होते. या प्रसंगी अपर विभागीय रेल्वे व्यवस्थापक (प्रशासन) श्री प्रवीण कुमार पाठक, अपर विभागीय रेल्वे व्यवस्थापक (तांत्रिक) श्री एम. के. मीणा तसेच विविध शाखांतील वरिष्ठ अधिकारी उपस्थित होते.
