मुंबई : भाजपचे विधान परिषद आमदार प्रसाद लाड यांच्या लेटरहेडचा गैरवापर करुन बनावट कागदपत्रे तयार केल्याच्या प्रकरणातील मुख्य संशयित हा भाजप युवा मोर्चाचा कार्यकर्ता निघाल्याने खळबळ उडाली आहे. मुंबईतील सायन पोलिसांनी अमित सोळुंके हा मुख्य संशयित असल्याचे म्हटले आहे. सोळुंकेने फेसबुक प्रोफाईलवर स्वतःची ओळख भारतीय जनता युवा मोर्चा (भाजयुमो) चा महाराष्ट्र प्रदेश सचिव अशी दिली आहे.
अमित सोळुंकेने रत्नागिरीत रस्त्याचे कंत्राट मिळवण्यासाठी बनावट लेटरहेड वापरल्याचा आरोप आहे. न्यायालयाने आरोपी अमित सोळुंके याला अटकपूर्व जामीन मंजूर केला असून तपासात सहकार्य करण्याचे निर्देश दिले आहेत. भाजप आमदार प्रसाद लाड यांचे लेटरहेड आणि सहीचा गैरवापर करुन 3 कोटी 60 लाख रुपयांचा निधी बीड जिल्ह्यासाठी वळवण्याचा प्रयत्न करत झाल्याचा आरोप करत दि. 2 जुलै रोजी एफआयआर दाखल केला होता. प्रसाद लाड यांनी दिलेल्या माहितीनुसार दि. 27 जून 2025 रोजी त्यांचा नोडल जिल्हा रत्नागिरीहून मुंबईला बदलला, तरीही त्यांच्या नावाने बनावट पत्र रत्नागिरी जिल्हा नियोजन कार्यालयामार्फत बीडसाठी निधी वळवण्याबाबत पाठवण्यात आले होते.
साक्षीदारांच्या जबाबामध्ये आरोपी अमित सोळुंके याची भूमिका समोर आली आहे असे सरकारी वकिलांनी त्याच्या जामीन अर्जाला विरोध करताना म्हटले होते. प्रसाद लाड यांचे सहाय्यक सचिन राणे यांना मुंबईतील डीपीओ संदीप भाकरे यांनी एका संशयास्पद पत्राबद्दल माहिती दिली होती. तपासानंतर, प्रसाद लाड यांच्या नावे बोलणाऱ्या एका व्यक्तीने एका विशिष्ट मोबाईल नंबरवरुन तोंडी हमी दिल्याचे उघड झाले. त्यानंतर, लाड यांनी रत्नागिरी जिल्हाधािरी आणि जिल्हा नियोजन कार्यालयाला पत्र त्वरित रद्द करण्यास सांगितले. तपासात असे दिसून आले की, हे बनावट पत्र प्रशांत लांडे यांनी बीड जिल्हा नियोजन कार्यालयात दिले. लांडेंनी सांगितले की, त्यांना ते निलेश वाघमोडे यांनी दिले. वाघमोडेंनी सांगितले की, सचिन बनकर यांनी ते पत्र त्यांना दिले. बनकर यांना विचारल्यावर त्यांना नीट उत्तरं देता आली नव्हती. त्यामुळे लांडे, वाघमोडे आणि बनकर या तिघांचीही नावं एफआयआरमध्ये आहेत.
