भुसावळ (प्रतिनिधी ): आद्यकवी महर्षी वाल्मिकी जयंती उत्सव समिती २०२६ च्या वतीने सोमवार, दि. २६ ऑक्टोबर रोजी भुसावळ शहरात आदिवासी कोळी समाज बांधवांच्या भव्य मोटारसायकल रॅलीचे आयोजन करण्यात आले. या रॅलीत समाजबांधव मोठ्या संख्येने सहभागी झाले होते. शहरातील विविध ठिकाणी रॅलीचे पुष्पवर्षाव करून स्वागत करण्यात आले. तसेच मार्गावरील महापुरुषांच्या प्रतिमांना पुष्पहार अर्पण करून अभिवादन करण्यात आले. साई मंदिरापासून रॅलीला सुरुवात शहरातील प्रसिद्ध साई मंदिरापासून या रॅलीला सुरुवात झाली. शहरातील प्रमुख मार्गांवरून मार्गक्रमण करत रॅलीचा समारोप कोळी मंगल कार्यालय (जुना सातारा) येथे करण्यात आला. संपूर्ण रॅली शिस्तबद्ध पद्धतीने काढण्यात आली. रॅलीच्या मार्गात असलेल्या महापुरुषांच्या प्रतिमा व पुतळ्यांना महर्षी वाल्मिकी जयंती उत्सव समिती आणि समाजबांधवांच्या वतीने पुष्पहार अर्पण करून अभिवादन करण्यात आले. मराठी पत्रकार संघातर्फे पुष्पवर्षाव बाजारपेठ पोलीस स्टेशनजवळ मराठी पत्रकार संघाच्या वतीने रॅलीचे स्वागत करण्यात आले. यावेळी संघाचे जिल्हाध्यक्ष संतोष शेलोडे, शहराध्यक्ष कमलेश चौधरी, मनोहर लोणे, विनोद गोरधे, सुनील आराक आणि आकाश ढाके यांनी रॅलीवर पुष्पवर्षाव करून सहभागी समाजबांधवांचे स्वागत केले. विविध सामाजिक कार्यकर्त्यांकडून उत्स्फूर्त स्वागत शहरातून मार्गस्थ होत असताना रॅलीचे विविध ठिकाणी उत्स्फूर्त स्वागत करण्यात आले. अनेक सामाजिक कार्यकर्त्यांनी रॅलीवर पुष्पवर्षाव करून आनंद व्यक्त केला. या स्वागताबद्दल महर्षी वाल्मिकी जयंती उत्सव समितीच्या वतीने संबंधित सामाजिक कार्यकर्त्यांना महर्षी वाल्मिकी यांची प्रतिमा व श्रीफळ भेट देऊन आभार मानण्यात आले. या रॅलीचे वैशिष्ट्य म्हणजे आदिवासी कोळी जमातीच्या समृद्ध सांस्कृतिक वारशाचे आणि पारंपरिक संस्कृतीचे दर्शन घडविण्यात आले. समाजाच्या परंपरा आणि सांस्कृतिक ओळखीची झलक यावेळी पाहायला मिळाली. शांततेत उत्सव साजरे करण्याचे आवाहन साई मंदिरापासून सुरू झालेल्या रॅलीचा कोळी मंगल कार्यालय येथे समारोप झाला. यावेळी महर्षी वाल्मिकी जयंती उत्सव समितीच्या वतीने तालुक्यातील आगामी जयंती उत्सव आणि विविध कार्यक्रम आनंदात, उत्साहात व शांततेच्या वातावरणात साजरे करण्याचे आवाहन करण्यात आले. भुसावळ शहरातील सामाजिक व राजकीय क्षेत्रातील मान्यवरांनी तसेच विविध नेत्यांनी रॅलीत सहभाग नोंदवून महर्षी वाल्मिकी जयंतीनिमित्त शुभेच्छा दिल्या. समितीचे पदाधिकारी व कार्यकर्त्यांची उपस्थिती या रॅलीच्या आयोजनासाठी उत्सव समितीचे अध्यक्ष आकाश सपकाळे, उपाध्यक्ष भास्कर दोडे व चंदन तायडे, सचिव सुरेश कोळी, सहसचिव दुर्गेश कोळी, कार्याध्यक्ष पवन मोरे, खजिनदार गणेश कोळी, योगेश कोळी, विजय कोळी, तसेच मार्गदर्शक नारायण कोळी, जितेंद्र सपकाळे सर, लक्ष्मण सपकाळे, विजय मोरे आणि मोहन सोनावणे यांच्यासह समितीच्या इतर पदाधिकारी व कार्यकर्त्यांनी पुढाकार घेतला. या रॅलीत आदिवासी कोळी समाजबांधवांसह विविध सामाजिक कार्यकर्ते मोठ्या संख्येने सहभागी झाले होते. महर्षी वाल्मिकी जयंतीनिमित्त आयोजित या रॅलीतून सामाजिक एकोपा, सांस्कृतिक परंपरेचा सन्मान आणि महापुरुषांप्रती आदरभाव व्यक्त करण्यात आला.
