भुसावळ, प्रतिनिधी दि. २६ ऑगस्ट : ईद-ए-मिलादुन्नबीच्या पवित्र पर्वानिमित्त बुधवारी भुसावळ शहरात मुस्लिम बांधवांचा धार्मिक उत्साह, शिस्त आणि शांततापूर्ण वातावरणात भव्य जुलूस संपन्न झाला. शहरासह परिसरातील सुमारे १५ ते १६ हजार मुस्लिम बांधवांनी या पवित्र जुलूसात उत्स्फूर्त सहभाग नोंदविला. जुलूसाच्या मार्गावर धार्मिक झेंड्यांसोबतच तिरंगा झेंडेही दिसून आले. लहान मुलांपासून ज्येष्ठ नागरिकांपर्यंत मोठ्या संख्येने नागरिक सहभागी झाले होते. विविध ठिकाणी खानपान व नाश्त्याची व्यवस्था करण्यात आली होती. जाम मोहल्ला परिसरातील मोठी सुन्नी जामा मस्जिद येथून पवित्र जुलूसाला सुरुवात झाली. आगावली चाल, खडका गावातील मुस्लिम कॉलनी, रजा टॉवर तसेच चिमटा मोहल्ला परिसरातील मुस्लिम बांधव अमरदीप चौकात एकत्रित आले. त्यानंतर जुलूस निर्धारित मार्गाने पुढे मार्गक्रमण करू लागला. जुलूस रजा टॉवर, अमरदीप चौक, आगाखान वाडा, शिवाजीनगर चौक, डॉ. बाबासाहेब आंबेडकर पुतळा, मॉडर्न रोड, सराफ बाजार, मोठी जामा मस्जिद, भजे गल्ली, मच्छीवाडा आणि जाम मोहल्ला मार्गे पुन्हा अमरदीप चौकात पोहोचला. त्यानंतर नगरपालिका उर्दू शाळा क्रमांक ३ जवळ जुलूसाची सांगता करण्यात आली. जुलूसादरम्यान उपविभागीय पोलीस अधिकारी केदार बारबोले यांनी संबंधित अधिकाऱ्यांकडून संपूर्ण मार्गाची माहिती घेत सुरक्षा व्यवस्थेचा आढावा घेतला. यावेळी अंजुमन अहले सुन्नत वल जमात कमिटीचे पदाधिकारी तसेच सराफ बाजारातील मोठी जामा मस्जिदचे विश्वस्त यांनी जुलूसाचे स्वागत केले. सुरक्षा, वाहतूक आणि कायदा व सुव्यवस्था अबाधित राखण्यासाठी पोलीस प्रशासनाकडून संपूर्ण मार्गावर विशेष व कडक बंदोबस्त ठेवण्यात आला होता. यावेळी उपविभागीय पोलीस अधिकारी केदार बारबोले, बाजारपेठ पोलीस ठाण्याचे पोलीस निरीक्षक राहुल वाघ, शहर पोलीस ठाण्याचे पोलीस निरीक्षक महेश गायकवाड, वाहतूक शाखेचे सहाय्यक पोलीस निरीक्षक राहुल भंडारे तसेच गोपनीय विभागाचे कर्मचारी उपस्थित होते. विशेष म्हणजे, जुलूस संपल्यानंतर गौसिया नगर येथील यंग ग्रुप आणि खडका गावातील मुस्लिम कॉलनीच्या यंग ग्रुपमधील युवकांनी जुलूसाच्या मागोमाग चालत संपूर्ण मार्गाची स्वच्छता केली. या स्तुत्य उपक्रमातून युवकांनी सामाजिक जबाबदारी आणि स्वच्छतेचा आदर्श घालून दिला. एकूणच, संपूर्ण शहरात ईद-ए-मिलादुन्नबीचा पवित्र जुलूस शांततापूर्ण, सुरक्षित आणि शिस्तबद्ध वातावरणात पार पडला. या पवित्र पर्वानिमित्त पैगंबर हजरत मोहम्मद साहेब यांनी दिलेला शांतता, करुणा, मानवता आणि बंधुभावाचा संदेश जनसामान्यांपर्यंत पोहोचविण्यात आला. शांतता राखा, बंधुभाव जपा आणि ईद-ए-मिलादुन्नबीचा पवित्र संदेश सर्वदूर पोहोचवा!
