भुसावळ (प्रतिनिधी) : "पत्रकारांचा सन्मान हा लोकशाहीचा सन्मान आहे आणि पत्रकारांचा अपमान कोणत्याही परिस्थितीत सहन केला जाणार नाही," असा स्पष्ट आणि कठोर इशारा देत भुसावळ तालुका व्हॉईस ऑफ मीडिया व महिला विंगच्या वतीने शिवसेना (शिंदे गट)चे खासदार संजय दिना पाटील यांनी पत्रकारांबाबत केलेल्या अपमानास्पद वक्तव्याचा तीव्र निषेध करण्यात आला. संबंधित खासदारांवर तातडीने गुन्हा दाखल करून कठोर कायदेशीर कारवाई करण्यात यावी, या मागणीसाठी मंगळवार, दि. १ जुलै रोजी भुसावळचे प्रांताधिकारी जितेंद्र पाटील यांना निवेदन सादर करण्यात आले. व्हॉईस ऑफ मीडिया – व्हीओएम इंटरनॅशनल फोरम ही प्रिंट, इलेक्ट्रॉनिक, डिजिटल, वेब, रेडिओ, साप्ताहिक, मासिक, छायाचित्रकार, कॅमेरामन, युट्यूब, सोशल मीडिया तसेच स्वतंत्र पत्रकारांना एकत्र आणणारी आंतरराष्ट्रीय पत्रकार संघटना असून, भारतासह तब्बल ७८ देशांमध्ये कार्यरत आहे. पत्रकारांचे हक्क, अभिव्यक्ती स्वातंत्र्य, पत्रकार संरक्षण कायदा, पत्रकार कल्याण आणि लोकशाही मूल्यांचे संरक्षण करण्यासाठी ही संघटना सातत्याने कार्यरत असल्याचे निवेदनात नमूद करण्यात आले आहे. पत्रकारांचा अपमान म्हणजे लोकशाहीवर हल्ला निवेदनात म्हटले आहे की, पत्रकारिता ही लोकशाहीचा चौथा स्तंभ असून समाज, शासन आणि जनतेमधील संवादाचा महत्त्वाचा सेतू आहे. सत्ताधाऱ्यांना प्रश्न विचारणे, सत्य घटनांची माहिती जनतेपर्यंत पोहोचविणे आणि लोकहिताचे प्रश्न निर्भीडपणे मांडणे हे पत्रकारांचे घटनात्मक आणि नैतिक कर्तव्य आहे. त्यामुळे पत्रकारांचा अपमान करणे म्हणजे प्रत्यक्षात लोकशाही मूल्यांवरच आघात करणे होय. खासदार संजय दिना पाटील यांनी पत्रकारांबाबत वापरलेली भाषा अत्यंत निषेधार्ह, दुर्दैवी आणि लोकशाहीला काळिमा फासणारी असल्याचे नमूद करत, एखाद्या पत्रकाराच्या प्रश्नाला उत्तर देण्याऐवजी त्याच्याबद्दल अवमानकारक वक्तव्य करणे ही संपूर्ण पत्रकारिता क्षेत्राची अवहेलना असल्याचे व्हॉईस ऑफ मीडियाने स्पष्ट केले आहे. पत्रकारांच्या सुरक्षिततेबाबत गंभीर चिंता लोकप्रतिनिधींकडून अशा प्रकारची वक्तव्ये केली गेल्यास समाजात पत्रकारांविषयी चुकीचा संदेश जातो. अशा वक्तव्यांमुळे पत्रकारांवर मानसिक दबाव निर्माण होतो, त्यांच्या सुरक्षिततेला धोका निर्माण होण्याची शक्यता वाढते आणि मुक्त व निर्भीड पत्रकारितेच्या वातावरणावर गंभीर परिणाम होतो, अशी चिंता निवेदनात व्यक्त करण्यात आली आहे. व्हॉईस ऑफ मीडियाच्या प्रमुख मागण्या व्हॉईस ऑफ मीडिया – व्हीओएम इंटरनॅशनल फोरमने शासनाकडे खालील मागण्या केल्या आहेत : खासदार संजय दिना पाटील यांच्यावर तातडीने गुन्हा दाखल करण्यात यावा त्यांनी संपूर्ण पत्रकार बांधवांची जाहीर आणि लेखी बिनशर्त माफी मागावी; केवळ दिलगिरी व्यक्त करून चालणार नाही. त्यांच्या वर्तनाची चौकशी करून आवश्यक ती कठोर कायदेशीर कारवाई करण्यात यावी. पत्रकारांचा अवमान करणाऱ्या कोणत्याही व्यक्तीविरोधात तात्काळ आणि कठोर कारवाईचे धोरण शासनाने जाहीर करावे राज्यातील पत्रकारांसाठी प्रभावी पत्रकार संरक्षण यंत्रणा उभारण्यात यावी न्याय मिळेपर्यंत खासदार संजय दिना पाटील आणि शिंदे गटाच्या पत्रकार परिषदांवर बहिष्कार कायम ठेवण्यात येईल पत्रकार आणि पत्रकारितेविरोधात आगपाखड करणाऱ्या प्रत्येक व्यक्तीविरोधात तात्काळ गुन्हा दाखल करण्याची प्रभावी व्यवस्था निर्माण करण्यात यावी. कारवाई न झाल्यास राज्यभर आंदोलन या प्रकरणात शासनाने तातडीने योग्य आणि कठोर कारवाई न केल्यास व्हॉईस ऑफ मीडिया – व्हीओएम इंटरनॅशनल फोरमच्या वतीने राज्यातील प्रत्येक जिल्हा, तालुका आणि शहरामध्ये लोकशाही मार्गाने तीव्र आंदोलन उभारण्यात येईल, असा इशारा निवेदनाद्वारे देण्यात आला आहे. या आंदोलनाची संपूर्ण जबाबदारी शासन आणि संबंधित लोकप्रतिनिधींवर राहील, असेही स्पष्ट करण्यात आले. "पत्रकारांवरील शाब्दिक, मानसिक अथवा शारीरिक हल्ले कोणत्याही परिस्थितीत सहन केले जाणार नाहीत. पत्रकारांच्या स्वाभिमानाचे आणि अभिव्यक्ती स्वातंत्र्याचे रक्षण करण्यासाठी व्हॉईस ऑफ मीडिया शेवटपर्यंत संघर्ष करेल," असा निर्धार यावेळी व्यक्त करण्यात आला.तरी आपल्या स्तरावर या निवेदनाची तातडीने दखल घेऊन ते महाराष्ट्र शासनाकडे पाठवावे व योग्य ती कार्यवाही व्हावी अशी मागणी भुसावळ तालुका वाईस ऑफ मीडिया तर्फे करण्यात आली आहे. यावेळी दैनिक सामना तालुका प्रतिनिधी तथा व्हॉईस ऑफ मीडिया महिला विंगच्या राज्य कार्यकारिणी जनसंपर्क प्रमुख उज्वला बागुल, भुसावळ तालुका अध्यक्ष प्रेम परदेशी, पदाधिकारी श्याम गोविंदा,सुनील आराक,कैलास उपाध्याय ,किशोर शिंपी, विनोद गोरधे,आकाश ढाके,कलीम पायलेट,राजू चौधरी,सतीश कांबळे, राजेश तायडे, धम्मरत्न गणवीर,हबीब चव्हाण, अभिजीत आढाव,अझहर शेख, मजहर शेख,जोहेब सैय्यद आदी पत्रकार बांधव उपस्थित होते.
