राज्यात गेल्या काही दिवसांपासून हवामानात सतत बदल होत असून काही जिल्ह्यांत अवकाळी पाऊस तर काही भागांत तीव्र उष्णतेची लाट जाणवत आहे. या पार्श्वभूमीवर हवामान विभागाने पुढील काही दिवसांसाठी महत्त्वाचा इशारा दिला आहे.
पुणे वेधशाळेच्या अंदाजानुसार, दक्षिण महाराष्ट्र आणि मराठवाड्यातील काही जिल्ह्यांत येत्या २ ते ३ दिवसांत तुरळक स्वरूपात अवकाळी पावसाची शक्यता आहे. सोलापूर, सांगली, सातारा, धाराशिव आणि लातूर या जिल्ह्यांसाठी यलो अलर्ट जारी करण्यात आला आहे. मात्र, मागील आठवड्याच्या तुलनेत यावेळी पावसाचा जोर कमी राहील, असा अंदाज व्यक्त करण्यात आला आहे.
दरम्यान, कोकण किनारपट्टी, विदर्भ आणि मध्य महाराष्ट्रात उन्हाचा तडाखा वाढत असून पुढील दोन दिवसांत तापमान ३८ अंश सेल्सिअसच्या पुढे जाण्याची शक्यता आहे. वाशिम येथे कमाल तापमान ३७.६ अंश सेल्सिअस नोंदवले गेले, तर धुळे येथे किमान तापमान १३.४ अंश सेल्सिअस इतके नोंदवले गेले.
मराठवाड्यात अवकाळी पावसामुळे शेती पिकांचे मोठे नुकसान झाले आहे. सांगली, सातारा आणि सोलापूर जिल्ह्यांत पावसामुळे नुकसानाची नोंद झाली आहे. विशेषतः धाराशिव जिल्ह्यात द्राक्ष उत्पादक शेतकरी गारपिटीमुळे चिंतेत असून उत्पादनावर मोठा परिणाम झाला आहे.
एकीकडे बाजारात द्राक्षांचे दर घसरले आहेत, तर दुसरीकडे गारपिटीमुळे फळांचे नुकसान झाले आहे. यामुळे शेतकऱ्यांवर दुहेरी आर्थिक संकट ओढावले आहे. ऐन काढणीच्या काळात आलेल्या या नैसर्गिक संकटामुळे शेतकऱ्यांमध्ये चिंता वाढली आहे.
