सुमारे ₹२५ कोटींची सेवानिवृत्ती देयके थेट खात्यात जमा; 'रेल्वे परिवार' परंपरेचे दर्शन भुसावळ (प्रतिनिधी) : मध्य रेल्वेच्या भुसावळ विभागात मंगळवारी (दि. ३० जून) विभागीय रेल्वे व्यवस्थापक कार्यालयातील कृष्णचंद्र सभागृहात सेवानिवृत्त रेल्वे कर्मचाऱ्यांच्या सन्मानार्थ गरिमामय सेवानिवृत्ती समारंभाचे आयोजन करण्यात आले. अत्यंत भावनिक, सन्मानपूर्ण आणि आत्मीय वातावरणात पार पडलेल्या या समारंभाला कार्यरत रेल्वे कर्मचारी, सेवानिवृत्त कर्मचारी तसेच त्यांच्या कुटुंबीयांची मोठ्या संख्येने उपस्थिती लाभली. यावेळी भुसावळ विभागातील एकूण ५२ रेल्वे कर्मचारी सेवानिवृत्त झाले. त्यापैकी ४३ कर्मचारी जुन्या निवृत्तीवेतन योजनेअंतर्गत (ओपीएस) तर ९ कर्मचारी नवीन निवृत्तीवेतन योजनेअंतर्गत (एनपीएस) होते. विविध सेवानिवृत्ती लाभांअंतर्गत सुमारे २५ कोटी रुपयांची रक्कम संबंधित कर्मचाऱ्यांच्या बँक खात्यांमध्ये थेट जमा करण्यात आली. समारंभाचे अध्यक्षस्थान विभागीय रेल्वे व्यवस्थापक, भुसावळ श्री पुनीत अग्रवाल यांनी भूषविले. यावेळी अपर विभागीय रेल्वे व्यवस्थापक (प्रशासन) श्री प्रवीण कुमार पाठक, वरिष्ठ विभागीय कार्मिक अधिकारी श्री दिलीप आर. खरात यांच्यासह विभागातील वरिष्ठ अधिकारी उपस्थित होते. अध्यक्षीय भाषणात श्री पुनीत अग्रवाल यांनी रेल्वे कर्मचारी ही भारतीय रेल्वेची सर्वात मौल्यवान संपत्ती असल्याचे सांगितले. कर्मचाऱ्यांनी आपल्या समर्पण, शिस्त आणि कर्तव्यनिष्ठेच्या बळावर भारतीय रेल्वेच्या प्रगतीमध्ये अमूल्य योगदान दिल्याचे त्यांनी नमूद केले. तसेच सर्व सेवानिवृत्त कर्मचाऱ्यांना निरोगी, सुखी व आनंदी आयुष्यासाठी शुभेच्छा देत त्यांच्या उज्ज्वल भविष्यासाठी मंगलकामना व्यक्त केल्या. अपर विभागीय रेल्वे व्यवस्थापक (प्रशासन) श्री प्रवीण कुमार पाठक यांनी सेवानिवृत्त कर्मचाऱ्यांच्या दीर्घ, समर्पित आणि उत्कृष्ट सेवाकाळाचे कौतुक करत त्यांच्या योगदानाला अविस्मरणीय असल्याचे सांगितले. त्यांनी सर्वांना उत्तम आरोग्य आणि आनंदी जीवनासाठी शुभेच्छा दिल्या. समारंभादरम्यान सर्व सेवानिवृत्त कर्मचाऱ्यांना पेन्शन पेमेंट ऑर्डर (पीपीओ) च्या प्रती प्रदान करण्यात आल्या. संपूर्ण कार्यक्रमात सन्मान, आत्मीयता आणि कौटुंबिक जिव्हाळ्याचे वातावरण अनुभवास आले. या समारंभाने मध्य रेल्वेच्या "रेल्वे परिवार" या सशक्त परंपरेला आणि संघटनात्मक संस्कृतीला अधिक बळकटी मिळाल्याची भावना उपस्थितांनी व्यक्त केली.
